話說孫慧雪Snow早前大肚接job,工作就做曬,但人工就遲遲未收到。琴日雪雪忍無可忍之下喺FB出post貼埋WhatsApp對話,鬧爆有關公司。網民梗係一面倒幫雪雪,仲話要起拖數公司底,再唱衰間公司。

琴日(11月14日)出嘅post鬧爆對方

點知事件峰迴路轉,今日雪雪再出post澄清有關公司原來已經找咗數,只係個職員入咗支票,話唔記得通知雪雪喎。不過重點係雪雪個post寫咗句:「今日突然收返好多數啦」。網民仲大讚雪雪可以幫收數公司代言人或拍廣告,但仙仔就擔心雪雪,點解呢?

今日(11月15日)出嘅澄清post

事實上好多廣告公司都有拖數情況,原因係廣告公司個客都拖佢地數,而個客通常係大公司,會計部找數規矩多,搞到出支票慢,廣告公司自然都無錢找數。呢種一環扣環嘅關係,最終受害人咪就係接job嘅KOL同藝人。

網民同雪雪囓對話

雪雪雖然收返好多數,但相信係其他有份搵雪雪幫手嘅公司怕咗比人誤會,殃及池魚,所以唔理三七廿一,找咗雪雪條數先!經過今次呢件事,呢啲公司都會怕咗雪雪,因為KOL咁樣公開鬧個客,又唔開名,好易令人誤會,殺錯良民,睇嚟短期內雪雪嘅工作查詢量會大跌......

其他網民嘅留言

雖然雪雪唔等錢洗,但呢單事件都有啟示畀啲KOL,贏咗人氣,輸咗工作,有幾嬲都好,切忌係公開出post鬧個客,倒人米時亦倒自己米,因為米飯班主最怕比人倒米。遇到拖數情況,最好搵人幫手追數,總好過自己出面追!